Home Master Index
←Prev   Job 18 as rendered by/in  Next→ 


18:1  ויען בלדד השחי ויאמר
18:2  עד-אנה תשימון קנצי למלין תבינו ואחר נדבר
18:3  מדוע נחשבנו כבהמה נטמינו בעיניכם
18:4  טרף נפשו באפו הלמענך תעזב ארץ ויעתק-צור ממקמו
18:5  גם אור רשעים ידעך ולא-יגה שביב אשו
18:6  אור חשך באהלו ונרו עליו ידעך
18:7  יצרו צעדי אונו ותשליכהו עצתו
18:8  כי-שלח ברשת ברגליו ועל-שבכה יתהלך
18:9  יאחז בעקב פח יחזק עליו צמים
18:10  טמון בארץ חבלו ומלכדתו עלי נתיב
18:11  סביב בעתהו בלהות והפיצהו לרגליו
18:12  יהי-רעב אנו ואיד נכון לצלעו
18:13  יאכל בדי עורו יאכל בדיו בכור מות
18:14  ינתק מאהלו מבטחו ותצעדהו למלך בלהות
18:15  תשכון באהלו מבלי-לו יזרה על-נוהו גפרית
18:16  מתחת שרשיו יבשו וממעל ימל קצירו
18:17  זכרו-אבד מני-ארץ ולא-שם לו על-פני-חוץ
18:18  יהדפהו מאור אל-חשך ומתבל ינדהו
18:19  לא נין לו ולא-נכד בעמו ואין שריד במגוריו
18:20  על-יומו נשמו אחרנים וקדמנים אחזו שער
18:21  אך-אלה משכנות עול וזה מקום לא-ידע-אל