Home Master Index
←Prev   Job 35 as rendered by/in  Next→ 


35:1  ויען אליהו ויאמר
35:2  הזאת חשבת למשפט אמרת צדקי מאל
35:3  כי-תאמר מה-יסכן-לך מה-אעיל מחטאתי
35:4  אני אשיבך מלין-- ואת-רעיך עמך
35:5  הבט שמים וראה ושור שחקים גבהו ממך
35:6  אם-חטאת מה-תפעל-בו ורבו פשעיך מה-תעשה-לו
35:7  אם-צדקת מה-תתן-לו או מה-מידך יקח
35:8  לאיש-כמוך רשעך ולבן-אדם צדקתך
35:9  מרב עשוקים יזעיקו ישועו מזרוע רבים
35:10  ולא-אמר--איה אלוה עשי נתן זמרות בלילה
35:11  מלפנו מבהמות ארץ ומעוף השמים יחכמנו
35:12  שם יצעקו ולא יענה-- מפני גאון רעים
35:13  אך-שוא לא-ישמע אל ושדי לא ישורנה
35:14  אף כי-תאמר לא תשורנו דין לפניו ותחולל לו
35:15  ועתה--כי-אין פקד אפו ולא-ידע בפש מאד
35:16  ואיוב הבל יפצה-פיהו בבלי-דעת מלין יכבר