Home Master Index
←Prev   Psalms 140 as rendered by/in  Next→ 


140:1  למנצח מזמור לדוד ב חלצני יהוה מאדם רע מאיש חמסים תנצרני
140:2  אשר חשבו רעות בלב כל-יום יגורו מלחמות
140:3  שננו לשונם כמו-נחש חמת עכשוב--תחת שפתימו סלה
140:4  שמרני יהוה מידי רשע-- מאיש חמסים תנצרני אשר חשבו לדחות פעמי
140:5  טמנו גאים פח לי-- וחבלים פרשו רשת ליד-מעגל מקשים שתו-לי סלה
140:6  אמרתי ליהוה אלי אתה האזינה יהוה קול תחנוני
140:7  יהוה אדני עז ישועתי סכתה לראשי ביום נשק
140:8  אל-תתן יהוה מאויי רשע זממו אל-תפק ירומו סלה
140:9  ראש מסבי-- עמל שפתימו יכסומו (יכסימו)
140:10  ימיטו (ימוטו) עליהם גחלים באש יפלם במהמרות בל-יקומו
140:11  איש לשון בל-יכון בארץ איש-חמס רע--יצודנו למדחפת
140:12  ידעת (ידעתי)--כי-יעשה יהוה דין עני משפט אבינים
140:13  אך צדיקים יודו לשמך ישבו ישרים את-פניך