Home Master Index
←Prev   Psalms 145 as rendered by/in  Next→ 


145:1  תהלה לדוד ארוממך אלוהי המלך ואברכה שמך לעולם ועד
145:2  בכל-יום אברכך ואהללה שמך לעולם ועד
145:3  גדול יהוה ומהלל מאד ולגדלתו אין חקר
145:4  דור לדור ישבח מעשיך וגבורתיך יגידו
145:5  הדר כבוד הודך-- ודברי נפלאתיך אשיחה
145:6  ועזוז נוראתיך יאמרו וגדלותיך (וגדלתך) אספרנה
145:7  זכר רב-טובך יביעו וצדקתך ירננו
145:8  חנון ורחום יהוה ארך אפים וגדל-חסד
145:9  טוב-יהוה לכל ורחמיו על-כל-מעשיו
145:10  יודוך יהוה כל-מעשיך וחסידיך יברכוכה
145:11  כבוד מלכותך יאמרו וגבורתך ידברו
145:12  להודיע לבני האדם--גבורתיו וכבוד הדר מלכותו
145:13  מלכותך מלכות כל-עלמים וממשלתך בכל-דור ודר
145:14  סומך יהוה לכל-הנפלים וזוקף לכל-הכפופים
145:15  עיני-כל אליך ישברו ואתה נותן-להם את-אכלם בעתו
145:16  פותח את-ידך ומשביע לכל-חי רצון
145:17  צדיק יהוה בכל-דרכיו וחסיד בכל-מעשיו
145:18  קרוב יהוה לכל-קראיו-- לכל אשר יקראהו באמת
145:19  רצון-יראיו יעשה ואת-שועתם ישמע ויושיעם
145:20  שומר יהוה את-כל-אהביו ואת כל-הרשעים ישמיד
145:21  תהלת יהוה ידבר-פי ויברך כל-בשר שם קדשו--לעולם ועד