Home Master Index
←Prev   Psalms 25 as rendered by/in  Next→ 


25:1  לדוד אליך יהוה נפשי אשא
25:2  אלהי--בך בטחתי אל-אבושה אל-יעלצו אויבי לי
25:3  גם כל-קויך לא יבשו יבשו הבוגדים ריקם
25:4  דרכיך יהוה הודיעני ארחותיך למדני
25:5  הדריכני באמתך ולמדני-- כי-אתה אלהי ישעי אותך קויתי כל-היום
25:6  זכר-רחמיך יהוה וחסדיך כי מעולם המה
25:7  חטאות נעורי ופשעי-- אל-תזכר כחסדך זכר-לי-אתה-- למען טובך יהוה
25:8  טוב-וישר יהוה על-כן יורה חטאים בדרך
25:9  ידרך ענוים במשפט וילמד ענוים דרכו
25:10  כל-ארחות יהוה חסד ואמת-- לנצרי בריתו ועדתיו
25:11  למען-שמך יהוה וסלחת לעוני כי רב-הוא
25:12  מי-זה האיש ירא יהוה-- יורנו בדרך יבחר
25:13  נפשו בטוב תלין וזרעו יירש ארץ
25:14  סוד יהוה ליראיו ובריתו להודיעם
25:15  עיני תמיד אל-יהוה כי הוא-יוציא מרשת רגלי
25:16  פנה-אלי וחנני כי-יחיד ועני אני
25:17  צרות לבבי הרחיבו ממצוקותי הוציאני
25:18  ראה עניי ועמלי ושא לכל-חטאותי
25:19  ראה-איבי כי-רבו ושנאת חמס שנאוני
25:20  שמרה נפשי והצילני אל-אבוש כי-חסיתי בך
25:21  תם-וישר יצרוני כי קויתיך
25:22  פדה אלהים את-ישראל-- מכל צרותיו