Home Master Index
←Prev   Psalms 29 as rendered by/in  Next→ 


29:1  מזמור לדוד הבו ליהוה בני אלים הבו ליהוה כבוד ועז
29:2  הבו ליהוה כבוד שמו השתחוו ליהוה בהדרת-קדש
29:3  קול יהוה על-המים אל-הכבוד הרעים יהוה על-מים רבים
29:4  קול-יהוה בכח קול יהוה בהדר
29:5  קול יהוה שבר ארזים וישבר יהוה את-ארזי הלבנון
29:6  וירקידם כמו-עגל לבנון ושרין כמו בן-ראמים
29:7  קול-יהוה חצב להבות אש
29:8  קול יהוה יחיל מדבר יחיל יהוה מדבר קדש
29:9  קול יהוה יחולל אילות-- ויחשף יערות ובהיכלו-- כלו אמר כבוד
29:10  יהוה למבול ישב וישב יהוה מלך לעולם
29:11  יהוה--עז לעמו יתן יהוה יברך את-עמו בשלום