Home Master Index
←Prev   Psalms 56 as rendered by/in  Next→ 



56:1  למנצח על-יונת אלם רחקים-- לדוד מכתם באחז אותו פלשתים בגת ב חנני אלהים כי-שאפני אנוש כל-היום לחם ילחצני
56:2  שאפו שוררי כל-היום כי-רבים לחמים לי מרום
56:3  יום אירא-- אני אליך אבטח
56:4  באלהים אהלל דברו באלהים בטחתי לא אירא מה-יעשה בשר לי
56:5  כל-היום דברי יעצבו עלי כל-מחשבתם לרע
56:6  יגורו יצפינו (יצפונו)--המה עקבי ישמרו כאשר קוו נפשי
56:7  על-און פלט-למו באף עמים הורד אלהים
56:8  נדי ספרתה-אתה שימה דמעתי בנאדך הלא בספרתך
56:9  אז ישובו אויבי אחור ביום אקרא זה-ידעתי כי-אלהים לי
56:10  באלהים אהלל דבר ביהוה אהלל דבר
56:11  באלהים בטחתי לא אירא מה-יעשה אדם לי
56:12  עלי אלהים נדריך אשלם תודת לך
56:13  כי הצלת נפשי ממות-- הלא רגלי מדחי להתהלך לפני אלהים-- באור החיים