Home Master Index
←Prev   Psalms 88 as rendered by/in  Next→ 


88:1  שיר מזמור לבני-קרח למנצח על-מחלת לענות משכיל להימן האזרחי ב יהוה אלהי ישועתי-- יום-צעקתי בלילה נגדך
88:2  תבוא לפניך תפלתי הטה אזנך לרנתי
88:3  כי-שבעה ברעות נפשי וחיי לשאול הגיעו
88:4  נחשבתי עם-יורדי בור הייתי כגבר אין-איל
88:5  במתים חפשי כמו חללים שכבי קבר-- אשר לא זכרתם עוד והמה מידך נגזרו
88:6  שתני בבור תחתיות במחשכים במצלות
88:7  עלי סמכה חמתך וכל-משבריך ענית סלה
88:8  הרחקת מידעי ממני שתני תועבות למו כלא ולא אצא
88:9  עיני דאבה מני-עני קראתיך יהוה בכל-יום שטחתי אליך כפי
88:10  הלמתים תעשה-פלא אם-רפאים יקומו יודוך סלה
88:11  היספר בקבר חסדך אמונתך באבדון
88:12  היודע בחשך פלאך וצדקתך בארץ נשיה
88:13  ואני אליך יהוה שועתי ובבקר תפלתי תקדמך
88:14  למה יהוה תזנח נפשי תסתיר פניך ממני
88:15  עני אני וגוע מנער נשאתי אמיך אפונה
88:16  עלי עברו חרוניך בעותיך צמתותני
88:17  סבוני כמים כל-היום הקיפו עלי יחד
88:18  הרחקת ממני אהב ורע מידעי מחשך