Home Master Index
←Prev   Psalms 9 as rendered by/in  Next→ 


9:1  למנצח על-מות לבן מזמור לדוד ב אודה יהוה בכל-לבי אספרה כל-נפלאותיך
9:2  אשמחה ואעלצה בך אזמרה שמך עליון
9:3  בשוב-אויבי אחור יכשלו ויאבדו מפניך
9:4  כי-עשית משפטי ודיני ישבת לכסא שופט צדק
9:5  גערת גוים אבדת רשע שמם מחית לעולם ועד
9:6  האויב תמו חרבות--לנצח וערים נתשת--אבד זכרם המה
9:7  ויהוה לעולם ישב כונן למשפט כסאו
9:8  והוא ישפט-תבל בצדק ידין לאמים במישרים
9:9  ויהי יהוה משגב לדך משגב לעתות בצרה
9:10  ויבטחו בך יודעי שמך כי לא-עזבת דרשיך יהוה
9:11  זמרו--ליהוה ישב ציון הגידו בעמים עלילותיו
9:12  כי-דרש דמים אותם זכר לא-שכח צעקת עניים (ענוים)
9:13  חננני יהוה--ראה עניי משנאי מרוממי משערי מות
9:14  למען אספרה כל-תהלתיך בשערי בת-ציון--אגילה בישועתך
9:15  טבעו גוים בשחת עשו ברשת-זו טמנו נלכדה רגלם
9:16  נודע יהוה--משפט עשה בפעל כפיו נוקש רשע הגיון סלה
9:17  ישובו רשעים לשאולה כל-גוים שכחי אלהים
9:18  כי לא לנצח ישכח אביון תקות ענוים (עניים) תאבד לעד
9:19  קומה יהוה אל-יעז אנוש ישפטו גוים על-פניך
9:20  שיתה יהוה מורה--להם ידעו גוים--אנוש המה סלה