Home Master Index
←Prev   Psalms 92 as rendered by/in  Next→ 


92:1  מזמור שיר ליום השבת ב טוב להדות ליהוה ולזמר לשמך עליון
92:2  להגיד בבקר חסדך ואמונתך בלילות
92:3  עלי-עשור ועלי-נבל עלי הגיון בכנור
92:4  כי שמחתני יהוה בפעלך במעשי ידיך ארנן
92:5  מה-גדלו מעשיך יהוה מאד עמקו מחשבתיך
92:6  איש-בער לא ידע וכסיל לא-יבין את-זאת
92:7  בפרח רשעים כמו עשב ויציצו כל-פעלי און להשמדם עדי-עד
92:8  ואתה מרום-- לעלם יהוה
92:9  כי הנה איביך יהוה-- כי-הנה איביך יאבדו יתפרדו כל-פעלי און
92:10  ותרם כראים קרני בלתי בשמן רענן
92:11  ותבט עיני בשורי בקמים עלי מרעים-- תשמענה אזני
92:12  צדיק כתמר יפרח כארז בלבנון ישגה
92:13  שתולים בבית יהוה בחצרות אלהינו יפריחו
92:14  עוד ינובון בשיבה דשנים ורעננים יהיו
92:15  להגיד כי-ישר יהוה צורי ולא-עלתה (עולתה) בו